Ыам ыйын 26 күнүгэр РФ Суруйааччыларын уонна суруналыыстарын сойууһун чилиэнэ, СӨ Култууратын туйгуна уонна үтүөлээх үлэһитэ, Чурапчы улууһун уонна Хоптоҕо нэһилиэгин Бочуоттаах гражданиннара Павел Петрович Федоров – Сомоҕо 75 үбүлүөйдээх сааһыгар аналлаах улуус дьаһалтатын аактабай саалатыгар үөрүүлээх тэрээһин ыытылынна. Бу тэрээһиҥҥэ кыттыыны ыллылар: улуус баһылыга А.С.Саргыдаев, улуус мунньаҕын бэрэссэдээтэлэ Я.П.Оконешников, суруйааччылар сойуустарын бэрэстэбиитэллэрэ, “Айар” кинигэ кыһатын генеральнай дириэктэрин солбуйааччы Луковцев В.Н., улууспут тэрилтэлэрин салайааччылара, суруйааччы үөрэппит оҕолоро, аймахтара, киэҥ общественность. Суруйааччы олоҕун, айар үлэтин сырдатар киэҥ ис хоһоонноох кинигэ быыстапката тэрилиннэ. Мустубут дьоҥҥо Сомоҕо “Ил Дархан из Боотур уус” диэн эрдэ тахсыбыт кинигэтин нууччалыы тылбааһын билиһиннэрдэ  Борисов киин сэбиэдиссэйэ В.А.Платонова. Мантан салҕыы суруйааччыга анаан эҕэрдэ тыллар этилиннилэр, наҕараадалар туттарылыннылар. Улуус бочуоттаах бэтэрээнэ үрдүк аат иҥэрилиннэ, ону тэҥэ Саха Өрөспүүбүлүкэтин бэтэрээннэрин сэбиэтин бочуоттаах анал бэлиэтэ туттарылынна. Сомоҕо өр сыл үлэлээбит Дириҥнээҕи оҕо ускуустубатын оскуолатын кэлэктиибэ бу биэчэри ырыанан-тойугунан киэргэттилэр. Биэчэри иилээн-саҕалаан ыытта улуус  баһылыгын социальнай боппуруостарга солбуйааччы М.Ф.Кронникова. Чурапчы улууһун дьоно-сэргэтэ тыа сиригэр олорор, айар, үлэлиир ытыктыыр суруйааччыбыт үбүлүөйүгэр толору саала мустан үбүлүөйүн үөрүүтүн үллэһиннилэр.      

Ыам ыйын 27 күнүгэр Борис Ельцин ыйааҕынан 1995 сыллаахтан Бүтүн Россиятааҕы Бибилэтиэкэ күнэ бэлиэтэнэр. Бу күн кииннэммит библиотечнай ситим бары үлэһиттэрэ, бэтэрээннэрэ анал идэлээх бырааһынньыктарын бэлиэтээтилэр. Тэрээһин үөрүүлээх чааһыгар Улуус уонна нэһилиэк дьаһалталарыттан, култуура салаатын салайааччыта уонна профкома, бибилэтиэкэ бииргэ үлэлэһэр тэрилтэлэриттэн бэйэлэрин эҕэрдэлэрин тиэртилэр уонна наҕараадалары туттардылар. А.П.Гоголев аатынан Чурапчытааҕы оҕо ускуустубатын иитиллээччилэрэ уонна кэллиэгэлэрбит музыкальнай эҕэрдэлэринэн үөрүүлээх чааһы киэргэттилэр. Идэлээх күнү көрсө ыытыллыбыт улууспут бибилэтиэкэлэрин үлэлэрин сырдатар видеороликтар куонкурустарын түмүгэ таҕыста. Үөрүүлээх быһыыга-майгыга кыайыылахтар бэлиэтэннилэр. Бу күн чэрчитинэн киин болуоссакка «Ааҕар хачыаллар» диэн уулуссаҕа ааҕыыны көҕүлүүр  кинигэ долбуура аһылынна. Бибилэтиэкэ профсойууһун тэрийиитинэн үлэһиттэргэ көхтөөк сынньалан тэрилиннэ.

Бу күн С.А.Новгородов аатынан Чурапчы орто оскуола кэлэктиибэ бөһүөлэги көҕөрдүү акция чэрчитинэн киин бибилэтиэкэ территориятыгар 20 хатыҥы олортулар. Оскуола кэлэктиибигэр, салайааччы М.С.Игнатьевка бибилэтиэкэбит территорията тупсарыгар көмөҕүт иһин улахан махталбытын тиэрдэбит.

Ыам ыйын 28 күнүгэр илин эҥэр улуустар алын кылаастарын оҕолоругар «Орлята России» слет ыытылынна. Уус Алдантан, Тааттаттан, Чурапчы улууһун Хатылы уонна Болтоҥо оскуолаларыттан барыта 80 тахса оҕо көхтөөхтүк кытыннылар. Хамаандалар элбэх тректэринэн тургутууну аастылар. Хамаандалар наставниктарыгар 7-8 кылаас оҕолоругар «Саарыннар суолларынан» диэн квиз- оонньууну уонна бибилэтиэкэҕэ экскурсияны Борисов киин үлэһиттэрэ бэлэмнээн ыыттылар.  Оҕо аймахха бэрт сонун, сэргэх тэрээһин буолан ааста.

Ыам ыйын 29 күнүгэр Айылгы норуот айымньытын дьиэтигэр М.А.Герасимова- Сэҥээрэ «Үҥкүүгэ уостубат тапталынан» диэн кинигэ сүрэхтэниитэ буолла. Бу кинигэ улууска үҥкүү сайдарыгар, тэнийэригэр бэйэлэрин сэмэй кылааттарын киллэрсибит улуус талба талааннара, үҥкүүнү идэ оҥостон олохторун анаабыт өрөспүүбүлүкэ театрдарыгар айымньылаахтык үлэлээн ааспыт уонна үлэлии сылдьар биир дойдулаахтарбыт уонна кэнчээри ыччаты, нэһилиэнньэни үҥкүү кэрэ эйгэтигэр уһуйбут, үҥкүүгэ сөҕүрүйбэт тапталынан куустаран өр сылларга айымньылаахтык үлэлээбит үҥкүү туруорааччыларбыт, бу кэрэ эйгэҕэ билигин сырдык ыранан салайтаран үлэлии сылдьар үтүөкэн ыччаттарбыт тустарынан суруллубут. Ааҕааччы киэҥ эйгэтигэр ананар. Ону тэҥэ “М.А.Герасимова- Сэҥээрэ сэҥээриллэр сэһэнэ” диэн киэҥ ис хоһоонноох кинигэ быыстапката турда. Быыстапкаҕа айар-суруйар олоҕун сырдатыы, үҥкүүгэ уостубут тапталынан, улууспут култууратын сырдатар, нэһилиэктэр кинигэлэрин оҥоруу, драма,пьесалар, чабырҕахтар, култуура бэтэрээннэригэр анаммыт ахтыылар, научнай-практическай кэмпириэнсийэҕэ кыттыбыт үлэлэрэ киирбиттэр. Быыстапканы бэлэмнээтилэр ааҕааччыны кытта үлэлиир салаа бибилэтиэкэрдэрэ М.Н.Кузьмина, А.П.Капрынова.

Ыам ыйын 30 күнүгэр «Бенефист читателя 2025» диэн сылын аайы ыытыллар бастыҥ ааҕааччыларга анал ааттар туттарылыннылар. Бастыҥ ааҕааччыларга бэйэлэрин эҕэрдэлэрин тириэртилэр: Чурапчы улууһун социальнай боппуруостарын исписэлииһэ А.А.Пермякова, Чурапчы тыа сирин түөлбэтин дьаһалтатын исписэлииһэ М.П.Матвеева,  Киин бибилэтиэкэ сэбиэдиссэйэ А.М.Смирникова, Борисов киин сэбиэдиссэйэ В.А.Платонова, ааҕааччыны кытта үлэлиир салаа сэбиэдиссэйэ М.Н.Кузьмина, Чурапчы литературнай түмсүү чилиэнэ Сандаар Күн С.С. Ол курдук «Преданный читатель» – Виктор Семенович Дьяконов, «Лучшие читающие супруги» — Вера Васильевна уонна Василий Васильевич Портнягиннар, «Читатель зарубежной литературы» — Марианна Анатольевна Сивцева, “Лучший читающий коллектив” – СКПК КС “Алмазкредитсервис” тэрилтэ салайааччы Мария Дмитрьевна Монастырева, “Читатель исследователь” – Светлана Павловна Макарова, “Читатель краеведческой литературы” – Людмила Анатольевна Яковлева анал ааттар хаһаайыннарынан буоллулар. Баҕарабыт ааҕааччыларбытыгар чэгиэн доруобуйаны, этэҥҥэ буолууну, куруутун бибилэтиэкэлиин бииргэ буолун.

Нэдиэлэ устата бибилэтиэкэҕэ ЕГЭ,ОГЭ туттарар оҕолорго консультациялар ыытылыннылар.