Муус устар 5 күнүгэр улуус дьаһалтатын аактабай саалатыгар  Чурапчы оройуонун салалтатыгар өр сыл салайар үлэҕэ үлэлээбит, партия райкомун сэкэритээрэ, РСФСР Үрдүкү Сэбиэтин депутата, «Бочуот знага» уордьан кавалера, Чурапчы улууһун Бочуоттаах олохтооҕо Макарова Евдокия Михайловна  олоҕун, үлэтин сырдатар » Дьоһун олоҕунан, бэриниилээх үлэнэн» кинигэ сүрэхтэниитэ буолла. Чурапчы оройуонун  биир бастыҥ чаҕылхай   салайааччыта Макарова Евдокия Михайловна туһунан кинигэ  “Чурапчы чулуу дьоно» сериянан тахсыбыт. Бу дьоһун кинигэни кыыһа Алена Николаевна Федорова таһааттарбыт. Кинигэ редакторынан Лыткина Дария Николаевна үлэлээбит. Кинигэ сүрэхтэниитин улуус депутаттарын Сэбиэтин  мунньаҕын бэрэссэдээтэлэ А. А. Захаров иилэн- саҕалаан ыытта.  Чурапчытааҕы библиотечнай ситим директора В. А. Платонова кинигэ ис тутулун сиһилии билиһиннэрдэ.  Көрсүһүүгэ «Үлэттэн  тахсыбыт салайааччы» кинигэ быыстапката, кыыһа Алена Николаевна ийэтин туһунан хаартысканан альбома, удостоверениялара   турдулар.  Библиотека үлэһиттэрэ Афанасий Пермяков   Евдокия Михайловнаҕа анабыл хоһоонун аахтылар, Максимов О., Захарова Н.Г. ырыанан эҕэрдэлээтилэр. Кинигэ сүрэхтэниитигэр тыа хаһаайыстыбатыгар бииргэ  үлэлээбит коллегалара, араас кэмнэргэ үлэлээбит сопхуос  салайааччылара, нэһилиэк баһылыктара, тэрилтэ салайааччылара, үөлээннээхтэрэ, аймахтара кэлэн кыттыыны ыллылар. Евдокия Михайловна олоҕо —  үлэҕэ анаммыт  көлүөнэ  чаҕылхай  холобура буолар. Оройуон  тыатын хаһаайыстыбатын сайыннарыыга  бастаан холкуос биригэдьииринэн, сүрүн зоотехнигынан, сопхуос дириэктэрин солбуйааччынан, оройуон соҕотуопкатын инспиэктэринэн, Чурапчытааҕы партия райкомун сэкэритээринэн үтүө субуостаахтык, ситиһиилээхтик үлэлээбитэ. Көрсүһүүгэ аҕа көлүөнэ дьон үлэлээн ааспыт кэмнэрин ахтан, убаастыыр киһилэрин Евдокия Михайловна туһунан иһирэхтик кэпсээтилэр. Улуус сайдыытыгар олохторун анаабыт, үлэһит үтүө дьоммут олохторо, үлэлэрэ билигин үлэлии хамныы сылдьар салайааччыларга,эдэр ыччакка үтүө холобур буолаллар. Кэлбит ыалдьыттар, тэрээһин кыттыылаахтара  сүгүрүйэр, бастыҥ дьоммут ааттарын үйэтитэр, сырдатар, ыччаты иитиигэ улахан оруоллаах кинигэлэр өссө да  тахса туралларыгар баҕардылар.