Балаҕан ыйын 5 күнүгэр “Айылгы” Норуот айымньытын дьиэтигэр  ССРС, РСФСР, Саха АССР үтүөлээх тренерэ, “Саха АССР үтүөлээх учуутала”, “Өктөөп өрөбөлүүссүйэтэ”, “Бочуот знага” уордьаннар кавалердара, “Саха сирин 20 үйэ чулуу киһитэ” бэлиэ хаһаайына  Дмитрий Петрович Коркин 95 сылыгар анаммыт общественнай мунньах буолан ааста.

 Манна Кииннэммит Чурапчытааҕы библиотека “Куоркун чыпчаала” диэн кинигэ быыстапкатын дьон көрүүтүгэр туруорда, ону таһынан “Чурапчы спортивнай чыпчаала” худуоһунньук И.С. Пинигин хартыыналарынан быыстапка, “Аҕам сырдык мөссүөнэ” Г.Д. Коркина чааһынай хаартыскаларынан быыстапкалар  турдулар.

 Общественнай мунньахха Чурапчы спорт бэтэрээннэрэ, Куоркун иитиллээччилэрэ, тэрилтэлэр салайааччылара, Чурапчытааҕы спортивнай институт студеннара, үлэһиттэрэ, Чурапчытааҕы спортивнай оскуола интернат оҕолоро, учууталлара, тренердэр уонна спорду сэҥээрэр общественность кыттыыны ыллылар.

  Чурапчы улууһун баһылыга Степан Анатольевич Саргыдаев улуу тренер олоҕун, сыралаах үлэтин, ситиһиилэрин биографиялаан кылгастык билиһиннэрдэ.

  Олимпийскай чемпион Павел Павлович Пинигин «Мой учитель Дмитрий Петрович Коркин: путь к триумфу” саҥа кинигэтин сүрэхтэммитин туһунан кэпсээн ааста.   Олимпийскай эрэллэри бэлэмниир республиканскай интернат-оскуола  дириэктэрэ Степан Афанасьевич Захаров оскуола үлэтин сүрүннүүр хайысхаларын, ситиһиилэрин, иитии программаларын кытта билиһиннэрдэ.

  Куоркун бастакы, иккис көлүөнэ иитиллээччилэрэ С.М. Неустроев, Г.М. Слепцов, Е.В. Пудов, С.С. Морфунов уо.д.а. Куоркун ураты көрүүтүн, хас биирдии оҕоҕо тус-туспа подход буларын, оҕолорго убаастабылы ыларын туһунан ахтан санаан аастылар.   Дмитрий Петрович Коркин оҕону эт-хаан өттүттэн эрчийэрин таһынан өй-санаа өттүнэн эмиэ иитэрэ, ол курдук хоһоон аахтарара, өйтөн суруттарара, нуучча классиктарыттан кинигэ бөҕө аахтарара. Киһи быһыытынан үтүө майгылаах ыччаттары иитэн таһаартаабыт.   “Улахан үлэттэн ситиһиилэр тахсаллар. Аныгы кэмҥэ тустуунан дьарыктанар усулуобуйа барыта баар. Онон Куоркун 100 сылыгар олимпийскай мэтээл кылбанныыра буоллар”— диэн баҕа санааларын эттилэр.Дмитрий Петрович Коркин 95 сааһыгар аналлаах тэрээһиннэриттэн быһа тардыылары көрүҥ, сэргээн.