Чурапчыга улуустааҕы киин библиотека иһинэн үлэлиир «Сахалыы эйгэ» проект чэрчитинэн   «Эмтээх от» түмсүү быйыл сайын от хомуйуутугар бэлэмнэнэр. Ол курдук аан бастаан тыаҕа тахсыах иннинэ, саха үгэһинэн Иэйэхсити чугаһатыы сиэрэ- туома оҥоһуллар. Онно анаан-минээн от хомуйааччылар бэйэлэрин илиилэринэн сылааһы иҥэрэннэр, саргылаах салама ситиитин хаттылар. Салама ыйааһынын сиэрэ-туома Иэйэхсит ыйыгар – ыам ыйын иккис аҥаарыгар, хатыҥ сэбирдэҕин тыллыыта оҥоһуллар.   Сүрүннээн Ньукуолун күнүгэр сөп түбэһиннэрэн, сайын кэлбитин бэлиэтиир холбуу тэрээһин курдук оҥоһуллар. Ол эрээри, дьыл кэлиититтэн уонна халлаан туругуттан көрөн, бу күн иннигэр да, кэннигэр да буолуон эмиэ сөп.  Ыам ыйа – Иэйэхсит ыйа буолар. Иэйэхсит Айыыны биһиги айылҕа таҥаратын быһыытынан билинэбит. Маны таһынан кини киһини-сүөһүнү араҥаччылыыр, чэгиэн туруктуур, оту-маһы тыынныыр аналлаах. Оччоҕо айылҕабыт уһуктан,  сайыммыт саҕалан от-мас көҕөрөн барар.  Сахалыы суругу бичиги айбыт, саха норуотугар сүҥкэн кылааты киллэрбит улуу киһибит Семен Андреевич Новгородов төрөөбүт алааһыгар, ытык Чуораайытта сиригэр от хомуйааччылар Болтоҥо олохтоох дьоннорун кытта Иэйэхсити чугаһатыы сиэрин-туомун оҥордубут.Бу күҥҥэ сахалыы таннан, алаадьы саламаат амсайан, хонууга хойуутук үүммүт бастакы сибэккибит- ньургуһуннуун алтыһан, тыалы тыал диэбэккэ,  ыллаан-туойан, астынан-дуоһуйан кэллибит.Дьэ бу сиэр-туом кэнниттэн айылҕа хаамыытынан утуу-субуу эмтээх отторбут үүнэн бараллар,  сайын устата хомуйуохпут, туспутугар туһаныахпыт, чэгиэн-чэбдик буоларга күүс-көмө буолуоҕа.                                                                                                «Эмтээх от»  түмсүү  салайааччыта улуустааҕы киин библиотека үлэһитэ Вероника Маркова