Муус устар 19 күнүгэр улуустааҕы киин библиотекаҕа   Россия үрдүнэн  сылын аайы  ыытыллар   «Библионочь — 2024»  тэрээһинэ   нэһилиэк олохтоохторун уонна ыалдьыттарын  түмтэ. Нэһилиэнньэ киэҥ  араҥатыгар кинигэни уонна ааҕыыны көҕүлүүр  сыаллаах   сырдатар аахсыйа  дьон –сэргэ,  улаханныын кыралыын  көхтөөхтүк  кыттар  тэрээһиннэрэ  быйыл 13-с  төгүлүн ыытыллар. Быйылгы  аахсыйа  «Дьиэ кэргэнинэн ааҕабыт»  девиһинэн  дьиэ кэргэн сылыгар анаммыт. Тэрээһин үөрүүлээх чааһыгар  Чурапчытааҕы  кииннэммит библиотечнай ситим  дириэктэрэ Вера Аполлоновна Платонова тэрээһин кыттыылаахтарын, кэлбит ыалдьыттары  эҕэрдэлээтэ.  Библиотекаҕа  куруутун сылдьар,  элбэҕи  ааҕар  дьиэ кэргэттэргэ  анал  ааттары  туттарыы үөрүүлээх  түгэнэ буолла. “Үгүс  өрүттээх ааҕар дьиэ кэргэн “  Дьячковская Ирина Васильевна, “Кыраайы  үөрэтэр  литератураны  ааҕар дьиэ  кэргэн”  Петрова Розалия Васильевна, «Уус-уран  литератураны ааҕар дьиэ кэргэн”  Давыдова Анна Викторовна, «Саамай  элбэҕи ааҕар дьиэ кэргэн”  Романов Петр Петрович  дьиэ кэргэттэрэ   анал ааттарынан  бэлиэтэннилэр.

      “Культура  көҕүлээһинин  өйүүр  дойду  Президенин фондатын»  күрэҕин кыайыылаахтара  улуустааҕы киин библиотека уонна  дьахтар Сүбэтэ  “Норуот инники  кэскилэ – тылыгар”  ( “В сохранении языка – будущее народа”)  бырайыага  олоххо  киириитин бэлиэтиир, түмүктүүр  үөрүүлээх  түгэнэ буолла. Улуустааҕы киин библиотека сүрүннүүр  библиотекара, ааптар  Римма  Петрова бырайыак  туһунан  сырдатта. Нуучча  улуу суруйааччыта  А.С.Пушкин  “Евгений Онегин”  айымньытын сахалыы тылынан  биир дойдулаахпыт, буойун-суруйааччы  Макаров Г.И. –Дьуон Дьаҥылы тылбааһын   Чурапчытааҕы  аграрно-техническай  колледж  студеннара  ааҕан  аудио  кинигэ оҥоһуллубут. Чурапчы улууһун баһылыгын социальнай боппуруостарга солбуйааччы  Мария  Филипповна  Кронникова төрөөбүт  тылы  харыстыыр, сайыннарар  суолталаах  кэскиллээх бырайыак  буоларын бэлиэтээтэ.  Бырайыак олоххо киирбитинэн   эҕэрдэлээн туран   Римма Викторовнаҕа уонна Мотрена Николаевна  Захароваҕа  улуус баһылыгын Бочуотунай грамоталарын  туттарда. Бырайыакка үлэлэспит, өйөөбүт  социальнай партнердарга, аудио  кинигэ  тахсарыгар үлэлэспит  педагог-библиотекарь Розалия Степановна  Пономареваҕа, “Айыллаан” сынньалаҥ киин специалиһыгар  Андрей Илларионовка,  колледж  студеннарыгар  улуустааҕы культура  управлениятын  уонна  киин библиотека  махтал суруктара  үөрүүлээх быһыыга-майгыга туттарылыннылар.

    Салҕыы  тэрээһин кыттыылаахтарыгар, ыалдьыттарыгар   олус интириэһинэй  өй оонньуулара,  туһалаах   маастар кылаастар, хоһоон ааҕыытын  күрэҕэ  ыытылыннылар.  «Семейный IQ»  өй  оонньуутун күрэҕэр  5  хамаанда  кыттан суруйааччылар, айымньылар  туһунан   ыйытыыларга эппиэттээн, илин-кэлин түсүһэн,  билиилэрин тургуттулар.  Хоһоон  ааҕыытын күрэҕэ  поэзияны сэҥэрээччилэри түмтэ. Кыттааччылар  үбүлүөйдээх  суруйааччылар  хоһооннорун   уустаан — ураннаан  ааҕан  бэрт сэргэхтик барда.    Тэрээһиҥҥэ сөбүлүүр  дьарыктарын  бэйэ дьыалата  оностубут,  айар –тутар  талааннаах  биир дойдулаахтарбыт Күннэй Лоскина “Видео Reels”, Татьяна Слюгрова – Күн Ай  “Сахалыы симэх”, Илья Лазарев  “Харысхал”, Анастасия Яковлева  “Суһуох киэргэлэ”  маастар кылаастары  ыыттылар, ону сэргэ  Владилена Абрамова, Саргылана Попова  анал аппаратынан    доруобуйаны тургутан көрдүлэр, чөл туруктаах буоларга  туһалаах бородууксуйалар тустарынан сырдаттылар. Кэлбит  ыалдьыттар  илиинэн оҥоруу  маастар кылаастарыгар  сылдьан   сиэдэрэй оҥоһуктары оҥорон  олус астыннылар.Тэрээһин кыттыылаахтара  дьиэ кэргэҥҥэ анаммыт «Семья  и книга – вместе по жизни», “Писатели — юбиляры” кинигэ  быыстапкаларын сэргээтилэр,  кэрэ көстүүлээх “Семейный Читаймер” фотозонаҕа  хаартыскаҕа түстүлэр. “Айар” кинигэ кыһатыттан  сонун кинигэлэри атыыластылар, «Библиокафе»  Саргылана  Афанасьева  минньигэс  аһылыктарын  амсайдылар. Кырачаан ыалдьыттар  “Игротека ”  араас  оонньуурдарынан  оонньоон,  күрэхтэһэн, уруһуйдаан   үөрдүлэр-көттүлэр. Быйылгы “Библионочь 2024” тэрээһиҥҥэ кыттыбыт дьоммут-сэргэбит   элбэҕи, сонуну, туһалааҕы билэн үөрэн-көтөн астынан тарҕастылар.