Барашкова Анна Дмитриевна — Айылҕаана саҥа кинигэтин «Санаа ситимэ» диэн хоһооннорун, тылбаастарын хомуурунньугун сүрэхтэниитэ буолла. 

Айылҕаана бэйэтин оҥоһуктара

Библиотека үлэһиттэрэ  Б. А. Дмитриевна — Айылҕаана хоһооннорун аахтылар.

СӨ үөрэҕириитин туйгуна, Россия уопсай үөрэхтээһинин бочуоттаах үлэһитэ, СӨ суруйааччыларын союһун чилиэнэ, тыл үөрэхтээҕэ Светлана Егоровна — Тулуйхаана саҥа кинигэни ырытта.

Тыл эттилэр: норуот айымньытын дьиэтин дириэктэрэ Л. И. Борисова уонна сельскэй библиотека сэбиэдиссэйэ В. М. Попова. 

Бэйэтин музыкальнай эҕэрдэтин тиэртэ Арыылаахтааҕы орто оскуола саха тылын учуутала Татьяна Андросова — Андриана. 

Литературнай түмсүү Библиотека үлэһиттэрэ: В. И. Душкина, Н. Н. Аммосова.Литературнай түмсүү чилиэнэ: Н. Н. Попова. Кинигэ уруһуйдарын Е. Т. Миронова уруһуйдаабыт. Бииргэ үөрэммиттэрэ: Е.П. Ершова, А.Н. Макарова, С.В. Коркина, А.Г. Филиппова. Балтылара: С.В. Христофорова, М.Д. Коркина.«Саҥа олох» корреспондена Сэмэн Жендринскэй.Кыыһа Т. И. Троева, кийиитэ С. Барашкова.     Дьон санаата:Кулун тутар 29 күнүгэр улуустааҕы киин библиотекаҕа сүрдээх истиҥ дьоро күн ааста.
Арыылаах нэһилиэгин далбар хотуна, айар куттаах ийэ, эбээ төрдүс «Санаа ситимэ» кинигэтин сүрэхтэниитэ бэрт сэргэхтик ааста. Бу тэрээһини киин библиотека специалиһа Марфа Николаевна иилээн саҕалаан ыытта. Библиотека кыргыттара Анна Дмитрьевнаны кытта хайдах билсибиттэрин, үлэлэспиттэрин астына кэпсээн, кини хоһооннорун киһи иһиттэр истэ туруох курдук аахтылар.
Анна Дмитрьевна Барашкованы — Айылҕаананы Чурапчы лит. түмсүүтүгэр биир бастыҥ айар куттаах киһинэн билинэн, бу күн кинини эҕэрдэлии нэһилиэктэртэн кэлитэлээбиттэр, кини айар талааныгар сүгүрүйээччи бүгүн кырыыламмыт алмаас күлүмүрдүү оонньуурун курдук араас өттүттэн баай, ураты көрүүлээх-истиилээх сайылык кыыһын атын өттүттэн арыллыбытын бэлиэтии көрдүбүт, астынныбыт.
Анна Дмитрьевна бу буруолуу сылдьар кинигэтин хас биирдии түһүмэхтэринэн СӨ үөрэҕириитин туйгуна,Россия уопсай үөрэхтээһинин бочуоттаах үлэһитэ СӨ суруйааччыларын Союһун чилиэнэ, тыл үөрэхтээҕэ Егорова Светлана Георгиевна-Тулуйхаана ырытыы оҥорбутун сонурҕаан, сэргээн, астына иһиттибит. Хас түһүмэх аайы атын атын эйгэҕэ киирэн тахсыталаатыбыт.
Анна Дмитрьевнаны нэһилиэгин дьоно- сэргэтэ эҕэрдэлээн, кини туһунан истиҥник сырдатан астыналларын, сөҕөллөррүн, убаастыылларын иһитиннэрдилэр, нэһилиэк баһылыгын эҕэрдэ суругун бэлэҕин туттаран, инникитин да Анналара нэһилиэк ыытар дьаһалларыгар бу курдук кытта, сүбэлии- амалыы турарыгар баҕардылар.
Анна бүппэт түбүктээх дьиэ, хотон үлэтиттэн ордон иистэнэрин, кылынан араас дьикти оҥоһуктары оҥорорун таһынан, араас темаларга бэрт хомоҕой тыллаах хоһооннору хотоҕостуу субурутарын сөҕөллөрүн, аны саҥа көрүҥҥэ туойга бэрт сыстаҕастык сыста түспүтүн, ол быыһыгар оҕолору араас көрүҥҥэ үөрэтэрин бэркиһииллэрин ууларыгар-хаардарыгар киирэн туран кэпсээтилэр.
Бэйэтин ылбаҕай ырыатын бэлэх уунан Арыылаахтан «Арыылаах» диэн Иван Кузьмин хоһоонугар айыллыбыт ырыаны Андриана ыллаабытын астына дуоһуйа иһиттибит.
Чурапчы айар түмсүү хомоҕой хоһоонньуттара Айылҕаананы эҕэрдэлээн бэлэх туһах туттаран, кини айбыт хоһооннорун ис сүрэхтэриттэн иэйэн, арыллан аахпыттарын иһийэн туран иһиттибит. Бу кинигэ тахсыытыгар ис бараанын киэргэтиигэ уруһуйдааһыҥҥа Кытаанах орто оскуолатын уруһуй учуутала Миронова Евдокия Тимофеевна хас хоһоон аайы иэйиитин ууран туран уруһуйдаабыта харахха быраҕыллар. Арыылаах орто оскуолатын библиотекара ТроеваТатьяна Ивановна оҥорбут слайдатынан оҥоһуллубут саҥа кинигэни электроннай варианын ааҕан элбэх киһи республика араас муннугуттан, Тааттаттан кыл- сиэл, туос абылаҥа группаттан Лариса Халгаева, Дьокуускайтан Чурапчы,Анаабыр улуустарын үөрэҕириитин бочуоттаах үлэһитэ, СӨ үөрэҕириитин туйгуна,РФ үөрэҕириитин бочуоттаах үлэһитэ Платонова (Попова) Саргылана Ефремовна, РФ, СӨ суруйааччыларын Союһун чилиэнэ Ольга Янцен, Дьааҥыттан Егор Сыромятников, Чурапчыттан Социальнай управленияттан Лидия Тосукаева, Оһуохай уола бэйэлэрин санааларын, эҕэрдэлэрин эппиттэрин иһиттибит, көрдүбүт.
Анна Дмитрьевнаны бииргэ үөрэммиттэрэ, аймахтара, оҕолоро эҕэрдэлээтилэр. Анна Дмитрьевна оҕото СВО-ҕа сылдьарынан байыаннай дьайыы ветераннарын бөлөҕүн аатыттан Семен Жендринскэй тыл этэн эҕэрдэлээтэ .
Айылҕаттан айдарыылаах айар куттаах Далбарбытыгар Анна Дмитрьевнаҕа- Айылҕаанаҕа дьон- сэргэ ис сүрэхтэн тахсар алгыстарын иҥэринэн, өссө да үтүмэн үгүс хоһооннору айан- тутан көрчөх гына көтүтэригэр, кэнчээри ыччаппытыгар саха тылын сүмэһинин, баайын утары уунан сахалыы тылбыт- өспүт үйэлэргэ сүппэттэригэр олук уурар киһибитигэр доруобуйаны, кэрэни, сырдыгы баҕаран астынан дуоһуйан тарҕастыбыт.Солуннаатым Клара-Уус кыыһа.Чурапчы