Алтынньы 28 күнүгэр улуустааҕы киин библиотека ааҕар саалатыгар «Алгыс» литературнай-музыкальнай салонугар Саха Өрөспүүбүлүкэтин үөрэҕириитин туйгуна, Чурапчы улууһун үөрэх салалтатын экономическай отдел экономиһа, олохтоох ааптар Марина Ивановна Захарова – Күөгэйэ Хатыҥ күн сиригэр сабыыс саҥа боруолуу сылдьар «Кыырай халлааҥҥа көттөрбүн» диэн алгыстар, кэс тыл, хоһооннор, хомуурунньуктарын кинигэтин сүрэхтэниитэ буолан ааспыта. Дьоро күн Аар айылҕаттан айдарыылаах, Ийэ айылҕата ууммут этитиилээх ураты бэлэҕин кутугар-сүрүгэр иҥэрэн, тыл абылаҥнаах дьүрүлгэнин дьиримнэтэ оонньотор Күөгэйэ Хатыҥ арчылыыр алгыһынан саҕаламмыта. Кинигэ Дьокуускай куоракка “Офсет” кинигэ кыһатыгар 2022 сыл бэс ыйын 24 күнүгэр, 40 страницалаах, 50 тираһынан бэчээттэнэн тахсыбата. Эппиэттиир эрэдээктэринэн, корректорынан, версткатын оҥоруутунан Дмитрий Петрович Коркин аатынан Чурапчытааҕы өрөспүүбүлүкээнискэй спортивнай олимпийскай эрэл интернат оскуолаҕа саха тылын уонна литературатын учуутала, СӨ үөрэҕириитин туйгуна, «Россия чулуу учуутала–2017» национальнай бырайыак кыайыылааҕа, өрөспүүбүлүкэтээҕи «Көтүөххэ үрдүккэ хотойдуу» уоланнар ааҕыыларын ааптара Акулина Николаевна Кузьмина буолар. Ааптарбыт иллэҥ  кэмигэр баайарын, иистэнэрин, оҕуруонан анньарын, туоһунан иистэнэрин, араас дьэрэкээн сахалыы оҥоһуктары оҥорор. Кини оҥоһуктарын быыстапката дьон болҕомтотун тардыан тарта. Надежда Колодезникова «Холонуу», Вероника Маркова – Үрүҥ үйэн  «Арылыйа», Надежда Попова «Сэттэ мэтириэт» хоһооннору, Татьяна Ушницкая, Евдокия Слепцова «Көттүм көй салгыҥҥа», Сардаана Федорова «Кэрэ куо», Светлана Ксенофонтова–Илгэйэ «Уоскулаҥ сааһыланар» алгыстары ааҕаннар сүрэхтэрии киэһэтин киэргэттилэр. Бииргэ үлэлиир коллегалара: экономическай отдел начальнига Николай Попов, профсоюз бэрэсэдээтэлэ Егор Давыдов, исписэлиис Анатолий Мандаров «Мичил» уһуйаан сэбиэдиссэйэ Марианна Яковлева, улуустааҕы кииннэмит библиотечнай ситим дириэктэрэ Вера Платонова, бэтэрээн бухгалтердар ааттарыннан Чакыр олохтооҕо Мария Ширяева, улуус оскуолаларын директордарын ааттарыттан А.П. Илларионов аатынан Хайахсыт орто оскуолатын директора Федор Борисов уо.д.а. ааптарга айар үлэ алыптаах аартыгынан аҕыраан ылбакка айаныырыгар, уран тыл иэйиитигэр уһун сылларга уостан хаалбакка умсугуйарыгар ис сүрэхтэн тахсар баҕа санааларын, алгыстарын анаатылар.Марфа КузьминаУлуустааҕы киин библиотека исписэлииһэ.