Бүгүн ыам ыйын 23 күнүгэр биир дойдулаахпыт прозаик, очеркист, публицист, РФ Суруйааччыларын  уонна Суруналыыстарын сойуустарын  чилиэнэ, СӨ  култууратын  үтүѳлээх үлэһитэ, СӨ  култууратын туйгуна, үлэ  бэтэрээнэ,    Хоптоҕо нэһилиэгин   Бочуоттаах олохтооҕо Федоров Павел  Петрович — Сомоҕо  төрөөбүт күнэ.

  Павел Петрович 1950 с. ыам ыйын 23 күнүгэр Амма  оройуонугар төрөөбүтэ.1972 с.Хабаровскайдааҕы пединститут художественно-графическай факультетын бүтэрэн Мэҥэ Хаҥалас Тыыллыма оскуолатыгар уруһуй уонна черчение учууталынан үлэлээбитэ.  Одьулууннааҕы, Үрэх Күөрэ учаастагын культура дьиэлэрин директорынан, Дириҥнээҕи народнай театр художнигынан, режиссерунан үлэлээбитэ. Дириҥнээҕи оҕо музыкальнай оскуолатыгар уруһуй кылааһыгар үйэ чиэппэрэ учууталынан үлэлээбитэ.  Павел Петрович айар үлэнэн 1990 сылтан дьарыктанар. Тэттик кэпсээннэрэ «Чолбон» сурунаалга, республика, улуус хаһыаттарыгар, сурунаалларыгар бэчээттэнэн барбыттара. 1993с.«Алгыстаах айаҥҥа» диэн эдэр суруйааччылар хомуурунньуктарыгар кэпсээннэрэ  киирбиттэрэ. «Дириҥ уоттара» литературнай түмсүүнү салайбыта. 1999с. Россия Cуруналыыстарын     сойууһун чилиэнэ. 2004 с. Россия Cуруйааччыларын сойууһун чилиэнэ.  Биир дойдулаахтарын,  улуус  олоҕун-дьаһаҕын, үлэтин- хамнаһын сырдаппыта, республика, улуус киэн туттар  чулуу дьоннорун  ааттарын  үйэтитэн дьоһун  кинигэлэри  суруйан  күн  сирин  көрдөрбүтэ: «Сүрэх сөҕүрүйбэт иэйиитинэн» (2002с),  «Дьонун, ыччатын туһугар» (2006с.), «Алаас  ырыаһыта-Айыл поэт» (2014с.), поэт Г.И.Егоров – Биилин туһунан «Кырдьык   тиллиитэ» (2018с.),«Кырдьык көмүстээҕэр    күндү» (2019с.), саха народнай суруйааччыта, үөрэппит учуутала В.С.Яковлев –Далан туһунан  «Умнуллубат «Дьикти саас» оҕолоро» (2008с.),«Учуутал дьоло-үөрэнээччилэрин  ситиһиилэригэр» (2012с.), “Дьикти саас” көлүөнэттэн көлүөнэҕэ (2023 с.), СӨ Бастакы президенэ М.Е. Николаев  туһунан «Барҕа махтал  Чурапчы дьонуттан» (2014с.), СӨ Ил Дархана, РФ Сенатора Е.А.Борисов туһунан «Боотур уустан   Ил Дархан» (2014с.).  Суруйааччы  эдэр  ыччакка иитэр-үөрэтэр дириҥ суолталаах, бүгүҥҥү олохпут сытыы проблемаларын сиэр-майгы сатарыйыытын, арыгылааһын содулун көрдөрөр күүстээх айымньылардаах. «Ол, ыҥырар тырымнас уоттар» (1999с.) «Дууһа кыланыыта» (2004с.), «Түүҥҥү куорат» (2015) “Саллаат уонна Таптал» (2020с.) ааҕааччы киэҥ сэҥээриитин ылбыт айымньылары суруйбута.  П.П.Федоров-Сомоҕо айар үлэтин сырдатар «Мэлдьитин ыҥырар саҕахтар» диэн кинигэ 2015с. «Саҥа олох» РИХ бэчээттэммитэ. 2019с. Сомоҕо тус олоҕун уонна айар үлэтин киэҥник сырдатар монографияны Е.Г. Винокуров суруйан таһааттарбыта.

Таһаарыылаахтык айа-тута сылдьар ытыктабыллаах суруйааччыбытын ааҕар эйгэ аатыттан истиҥник эҕэрдэлиибит! Өссө да элбэх кэрэ кэпсээннээх-сэһэннээх кинигэлэри ааҕааччыларгар бэлэхтии тураргар, үтүө доруобуйаны, дьиэ кэргэҥҥэр дьолу-соргуну баҕарабыт!