2023 сыл, тохсунньу ый 20 күнүгэр, улуустааҕы киин библиотека ааҕар саалатыгар «Буочардар…буочардар…» диэн Аан дойдуга илиинэн суруйуу күнүгэр аналлаах тэрээһин ыытылынна. Тэрээһин   сүрүн сыалынан — сахалыы сурукка — бичиккэ болҕомто ууруу, илиинэн суруйууга убаастабылы үөскэтии, кыраһыабайдык, кэрэтик суруйарга дьулуһуу буолар. «Графология-буочар туһунан наука» диэн кинигэ быыстапката, библиотека үлэһитэ В.И Душкина харайан уурбут  раритет маллара:бөрүөлээх мас уруучуката, чэрэниилэ иһитэ, 1962 сыллаах  «Пропись» тэтэрээтэ уонна үөрэхтээһин тэрилтэтэ ыыппыт «Бастыҥ буочар» диэн   илиинэн суруллубут үлэлэр быыстапкаларын күрэстэһээччилэр сэҥээрэн-биһирээн, сөҕө көрдулэр.

 Ааҕааччыны кытта үлэлиир отдел специалистара Р.В. Петрова урукку чистописание уруоктарын сөргүтэн,  буукубалар хайдах суруллалларын көрдөрөн кэпсээтэ, суруйан холонорго эрчиллиилэри оҥоттордо, С.А. Дьячковская «Графология» нөҥүө буочар киһи майгытын–сигилитин быһаарарын туһунан сиһилии кэпсээтэ. Биэчэр саамай муҥутуур кэминэн «Бастыҥ буочар» диэн күрэс буолла. Манна араас идэлээх, оскуола оҕотуттан, аҕам саастаахтарга тиийэ дьон кытыннылар. Кыттааччылар биир дойдулаахпыт, суруйааччы С.С.Яковлев- Эрилик Эристиин «Кыраттан орпут» диэн кэпсээниттэн быһа тардыыны сыыһата суох, саамай кэрэ буочардарынан устан ыллылар.    Барыта 15 үлэ толоруллан, Артемьева М.С, Коркина А.Н, Кузьмина М.Н састааптаах  дьүүллүүр сүбэ кыайыылаахтары быһаарда.    Күрэс түмүгүнэн, «Кылаан кыайыылааҕынан» Коркина Римма Николаевна пенсионер, 1 миэстэ-Захарова Катерина Константиновна— Чурапчытааҕы оҕо ускуустуба оскуолатын преподавательэ, 2 миэстэ — Сивцева Анастасия  Дмитриевна И.М.Павлов аатынан орто оскуола учуутала, 3 миэстэ — Осипова Екатерина  Ивановна-пенсионер буоллулар. Чурапчы улууһун Бочуоттаах олохтооҕо, култуура бэтэрээнэ Василий Николаевич Дьячковскай оскуолатааҕы сылларын ахтан, илиинэн суруйуу туһалааҕын туһунан бэйэтин санаатын тиэртэ.       Пинигина Алеся- С.А. Новгородов аатынан орто оскуола 6 кылааһын үөрэнээччитэ кыраһыабай, ыраас буочара сөхтөрдө. 
   Бу тэрээһини  «Электродом»  (салайааччы — Руслан Николаевич Ноев), « Ситим » (салайааччы- Зоя Николаевна Сивцева), «Все для дома» (салайааччы-  Прасковья Николаевна Захарова) чааһынай урбаанньыттар   өйөөн,бэйэлэрин бириистэрин туруоран, дьоннорун- сэргэлэрин үөртулэр.Маннык күрэстэр дьиэ-кэргэн, тэрилтэ, түмсүүлэр истэригэр, мэлдьи көхтөөхтүк  ыытыллан, илиинэн суруйуу умнуллан хаалбакка кэрэхсэнэ турдун . 

Иһитиннэриини оҥордо: Матрена Николаевна ЗахароваЧурапчытааҕы киин библиотека, ааҕааччыны кытта үлэлиир отдел үлэһитэ.