Телефон: +7 (411-51)42-713
Республика Саха (Якутия), Чурапчинский район, с.Чурапча
ул. Ярославского 18 Режим работы пн-сб: с 9:00 до 18:00
21.03.2017

ЧУРАПЧЫГА — КУЛЬТУРА ҮЛЭҺИТТЭРИН КҮНЭ

21.03.2017

 

Кулун тутар 21 күнүгэр Россиятаа5ы культура үлэһитин күнүн чэрчитинэн «Улуустаа5ы культура салаатын» уонна Чурапчытаа5ы кииннэммит библиотечнай ситим тэрийиитинэн Чурапчы улууһун культуратын, искусствотын үлэһитигэр аналлаах интэриэһинэй, солун тэрээһин ааста.

Ол курдук, күн бастакы аӊарыгар «Үбүлүөйдээх Чурапчы суруйааччылара» диэн Чурапчы улууһун культуратын үлэһиттэрин икки ардыларыгар конференция буолла. Конференция сүрүн сыалынан улуус биллиилээх суруйааччыларын олохторун, айар үлэлэрин үөрэтии, дьоӊӊо тиэрдии, ону тэӊэ, культура үлэһиттэрин литература5а чугаһатыы, чинчийэр үлэ5э көҕүлээһин буолар.

Культура, искусство үлэһиттэригэр ыытыллыбыт бастакы улуустаа5ы конференция5а музейтан, Ил Дархан библиотекатыттан, искусство оскуолатыттан, библиотекаттан, норуот айымньытын кииниттэн, культура салаатыттан уопсайа 11 аа5ааччы кыттыыны ылла. Чурапчы — уран тыллаах, бастыӊ айымньылаах чулуу суруйааччылар уутуйан үөскээн-төрөөн ааспыт түөлбэлэрэ буолар. Күн бүгүн да5аны суруйа-бичийэ сылдьар айар куттаах дьоммут элбэх. Үгүс дакылаат Чурапчы суруйааччыларын айар үлэлэрин, тус олохторун сырдатыыга ананна. Холобур, культура управлениетын сүрүн специалиһа Мария Герасимова суруйааччы, поэт, тылбаасчыт С.Ф.Софронов – Феоктист Софронов оло5ун, «Үрдэл» норуот творчествотын киинин методиһа Саргылана Старостина СР культуратын үтүөлээх үлэһитэ, ССРС бэчээтин туйгуна, П.А.Ойуунускай аатынан Государственнай премия лауреата И.Е.Федосеев-Доосо аатын үйэтитиини, Кииннэммит библиотечнай ситим библиотекара Марфа Кузьмина Саха Өрөспүүбүлүкэтин Государственнай Мунньаҕын (Ил Түмэн) Бэрэстэбиитэллэрин Палататын бастакы бэрэссэдээтэлэ, Саха Өрөспүүбүлүкэтин үтүөлээх юриһа, нарын тыллаах поэт Афанасий Илларионов айымньыларын, Сылаӊнаа5ы библиотека филиалын библиотекара Анастасия Аммосова поэт, прозаик, Аҕа дойду Улуу сэриитин кыттыылааҕа А.С.Бродников уонна поэт, учуутал, Аҕа дойду Улуу сэриитин  кыттыылааҕа В.И.Башарин сөп түбэһэр өрүттэрин, Т.П.Местников аатынан Бахсытаа5ы норуот творчествотын киинин директора Туяра Слепцова, библиотекара Лариса Аргунова буойун суруйааччы Н.Д.Слепцов – Туобулаахап оло5ун, айар үлэтин кэпсээтилэр. Онтон да атын иһитиннэриилэр, көрүүлэр Дьүүллүүр Сүбэ сыанабылыгар таҕыстылар. Дьүүллүүр Сүбэ эдэр специалистары хай5аата. Ол курдук, Андрей Гоголев аатынан Чурапчытаа5ы искусство оскуолатын художественнай кылааһын преподавателэ Татьяна Сокольникова Иннокентий Левин хоһооннорун үөрэтиигэ мнемотехника ньыматын туһаныыны, Чурапчы нэһилиэгин о5о библиотекатын библиотекара Елена Дьячковская «Лэпбук» ньыматынан о5ону аа5ыыга уһуйууну практическай материаллаах сырдаттылар.

Кыттааччыларга туоһу сурук, өйдөбүнньүк кинигэ туттарылынна. Сылаӊ нэһилиэгин библиотекара Анастасия Аммосова, Хопто5отоо5у «Үрдэл» норуот творчествотын киинин методиһа Саргылана Старостина 3 миэстэлээх диплому, РСФСР культуратын үтүөлээх үлэһитэ, ССРС культуратын туйгуна Мария Герасимова 2 миэстэлээх диплому уонна о5о библиотекатын библиотекара Елена Дьячковская кыайыылаах ааты ыллылар.

Киэн туттар киһибит Мария Герасимова – Сэӊээрэ конференция туһунан бэйэтин санаатын үллэстэр: «Конференция ыытыллыбыта үчүгэй ба5айы. Ити хомуллубут материал пособие буолан та5ыста5ына үйэтитиллиэ этэ. Сыл ахсын тэриллэн ыытылынна5ына таһыма өссөүрдүө, хаачыстыбата тупсуо».

Күн иккис аӊарыгар «Брейн-ринг» интеллектуальнай күөн-көрсүһүү бэрт сэргэхтик ааста. Культура, искусство тэрилтэлэриттэн 6 хамаанда илин-кэлин түһүстэ.

«Брейн-ринг» хаамыытын Чурапчытаа5ы кииннэммит библиотечнай ситим үлэһитэ Павел Абрамов биир да мөккүһүүнү таһаарбат гына үс турунан толкуйдаан ыраастык иилээн-са5алаан ыытта.

«Брейн-ринг» кыайыылаа5ынан буоллулар: 3 миэстэ – библиотека үлэһиттэрин «Библиомир» хамаандата, 2 миэстэ – музей сотрудниктарын «Чороон» хамаандата, 1 миэстэ – культура управлениетын «Тииӊ мэйии» хамаандата. Миэстэлэспиттэр түөстэрэ мэтээлинэн симэннэ, бары кыттыылаахтар туоһу сурук туттулар, минньигэс торду амсайдылар.

Бары коллегаларбытын Чурапчы культуратын байыастарын аатыттан профессиональнай күммүтүнэн эйэ5эстик э5эрдэлиибит! Ба5арабыт түбүктээх үлэ5итигэр ситиһиини, айар-тутар айылгыгытыгар творческай үүнүүнү, дьиэ кэргэӊӊитигэр уйгуну-быйаӊы!

Мария Васильева.                                                                                           Источник: Управление культуры

    Добавить комментарий
    Введите код с картинки
    Необходимо согласие на обработку персональных данных