Телефон: +7 (411-51)42-713
Республика Саха (Якутия), Чурапчинский район, с.Чурапча
ул. Ярославского 18 Режим работы пн-сб: с 9:00 до 18:00

Новости

 

Ийэ тыл  уонна  сурук-бичик күнүнэн  улуус  библиотекалара  араас  дьаһаллары  ыыттылар. Ол  курдук  улуустааҕы  киин  библиотекаҕа  ааҕааччылар  сахалыы  диктант  суруйуутугар  кытыннылар. Диктант  суруйуутугар 31  киһи кэлэн,  сахалыы  төһө  сөпкө  суруйалларын  тургутан  көрдүлэр.  Үөрэнээччилэр,  учууталлар, уһуйаан  иитээччилэрэ, медиктэр,  культура  үлэһиттэрэ,  пенсионердар , онтон  да  атын  идэлээх  дьон  кытыннылар. Диктаны  таһынан мүнүүтэҕэ  төһө тылы  ааҕалларын тургуттулар. Биир  дойдулаахпыт, суруйааччы  Михаил  Доҕордуурап «Уордаахап  уоһа» диэн  кэпсээнин  мүнүүтэҕэ  аахтылар. Саамай  элбэх  тылы  ааҕыы  180 –ҥа тиийдэ. «Маны төһө  билэҕин?»  диэн  тургутукка таабырыннары  таайдылар, сахалыы  тыл  суолтатын  быһаардылар,  саха  литературатын боппуруостарыгар  эппиэттээтилэр. Диктант  саха  норуодунай  суруйааччыта  Амма  Аччыгыйа «Мотуо»  диэн  кэпсээниттэн ылылынна. Барыта  240  тыллаах.  Диктант  кэнниттэн “Мотуо”  диэн сахалыы уус-уран  киинэни көрдүлэр.

 

       Быйыл Россияҕа Литература сыла биллэриллибит кэрэ-бэлиэ кэмигэр П.П.Федоров – Сомоҕо, Россия суруйааччыларын уонна суруналыыстарын союһун чилиэнэ, СР культуратын үтүөлээх үлэһитэ, СР культуратын туйгуна,  Хоптоҕо нэһилиэгин Бочуоттаах олохтооҕо, прозаик, журналист, 65 сааһын туолла.

     “Мэлдьитин ыҥырар саҕахтар” диэн хомуурунньукка айар үлэтин көрдөрөр ыстатыйалар, интервьюлар, анаарыылар киирдилэр. Бу кинигэни Чурапчытааҕы кииннэммит библиотечнай ситим көҕүлээн таһаартарда. Библиотекарь Е.Н.Макарова хомуйан оҥордо. Улууспут  “Саҥа олох” РИХ-гэр бу күннэргэ бэчээттэнэн таҕыста.

     Маны тэҥэ өссө биир сабыс саҥа  “Түүҥҥү куорат”диэн кинигэтэ “Бичик” НКК “Билиҥҥи кэм прозата” диэн 2006 с-тан олохтоммут сериянан бэчээттэнэн таҕыста. Манна “Түүҥҥү куорат”,  “Олоххо тардыһыы” диэн сэһэннэрэ киирбиттэр.

     Суруйааччы үбүлүөйүгэр аналлаах литературнай биэчэр төрөөбүт улууһугар Чурапчы киинигэр киэҥ общественность кыттыылаах үрдүк таһымҥа тэрилиннэ. Манна кыттыыны ыллылар улуус дьаһалтата, суруйааччылар Сэмэн Тумат, Урсун,  “Бичик” НКК директора Егоров А.В., кылаабынай редактора Луковцев В.Н. ону тэҥэ эдэр суруйааччылар Яна Байгожаева, Зинаида Попова, Гаврил Андросов.

 

Биир дойдулаахпыт,  суруналыыс,  элбэх  кинигэ  автора  И.И.Попов-Бахсылыров Кыайыы  70  сылыгар үс кинигэни  таһааттарда. «Ааспыт ахтылыннын, урукку умнуллубатын»,  «Сэрии ыар  сыллара – хаһыҥ хаарыйбыт дьонноро», «Иринньэх о5о саас – эрдэлээн  сиппит  саас». Ахсынньы  10 күнүгэр төрөөбүт –үөскээбит  Бахсытыгар кинигэлэрин сүрэхтэниитин дьоро киэһэтэ  буолла. Бу  дьоро күнү Уус – Алдан киин  библиотекатын үлэһиттэрэ  тэрийэн ыыттылар. Биэчэргэ  Бахсы  нэһилиэгин  дьаһалтатын  баһылыга,  олохтоох  нэһилиэнньэ  кыттыыны ыллылар. Кинигэ  тула санаа  атастаһыыта  буолла, үйэтитиигэ үлэлиир киэн туттар киһилэригэр баҕа  санаа  бастыҥын анаатылар. Биэчэри  Уус-Алдан  талааннаах  дьоно ырыанан, үҥкүүнэн  киэргэттилэр.

 Ахсынньы 1 кунугэр  Одьулуун  модельнай библиотекатыгар (сэбиэд.А.Р.Аржакова) интэриэһинэй  кинигэ быыстапката  тэрилиннэ. Бу быыстапкаҕа  Одьулууннааҕы  аграрнай  техникум  библиотекара  Анна  Дмитриевна  Михайлова кыра  кээмэйдээх кинигэлэрин  коллекцията дьо-сэргэ  көрүүтүгэр турда. Анна  Дмитриевна кыра  кинигэлэри  мунньуунан  дьарыктаммыта  5  сыл  буолла.  Араас  темаҕа  кинигэлэр  бааллар. Нуучча,  саха,  омук  классик  суруйааччыларын кинигэлэрэ, кынаттаах  тыллар,  афоризмнар  хомуурунньуктара  бааллар.

26.11.2015
Саҥа кинигэлэр!
26.11.2015

Улууспут   норуотун  маастардарыгар, дьарыктаныан, кэрэни  айыан  баҕалаах  уран  тарбахтаахтарга  аналлаах  саҥа  кинигэлэр:

 

 

         Сэтинньи 25 күнүгэр Дьокуускай куоракка Саха циркатын дьиэтигэр Олонхо Декадатын аһыллыытыгар Чурапчытааҕы киин библиотека  “Олоҥхо - өрөгөйө, саха саргыта” диэн Чурапчы улууһун олоҥхоһуттарын, Олоҥхолорун, Олоҥхону чинчийээччилэрин, Олоҥхонон иитэр пособиялары көрдөрүүгэ туруорда.

      Быйыл республиканскай Олоҥхо ыһыаҕын көрсө улуус уопсайа 25 кинигэни үбүлээн таһаарбыта. «Чурапчы  олоҥхото» диэн сериянан 9 кинигэ,  “Раритеты Якутии” Чурапчинский улус, М.А.Герасимова-Сэҥээрэ “Айдарыылаахтар”, “Талба талааннар” кинигэлэр элбэх дьон сэҥээриитин  ылла.

 

Сэтинньи 20 күнэ – Бүтүн Россиятааҕы оҕолорго правовой көмө күнүнэн биллэриллэн турар. Бу күн Чурапчы нэһилиэгин үс оскуолатын оҕолоругар «Квест –игра по станциям» оонньууну Чурапчы улууһунааҕы саастарын ситэ илик оҕолор дьыалаларын комиссиятын, Ис дьыала отделын саастарын ситэ илик оҕолор дьыалаларын подразделениетын кытта библиотечнай ситим правовой информациятын киинэ тэрийэн ыыттыбыт. Командалар Чурапчы нэһилиэгин картатынан сирдэтэн үлэлии олорор тэрилтэлэринэн сылдьан,  үлэлэрин кытта билсэн, консультациялары  ылан, боппуруостарга эппиэттээн, балл хомуйан кэллилэр. Күрэхтэһээччилэр уопсайа нэһилиэк 8 тэрилтэлэринэн сылдьан,  туһааннаах сорудахтары толордулар. Манна общественнай сиргэ сылдьыы бэрээдэгэ, суол быраабылаларын тутуһуу – барыта учуоттанна. Бүтэһик этабынан улуустааҕы библиотекаҕа үс оскуола командалара түмсэн «Калейдоскоп знаний» интеллектуальнай оонньууга билиилэрин тургутуһан аастылар. Оонньуу түмүгүнэн улуустааҕы гимназия командата – бастакы, С.А.Новгородов аатынан Чурапчы орто оскуолата – иккис, И.М.Павлов аатынан 2-с №-дээх оскуола – үһүс миэстэлэргэ тиксэн грамоталарынан, сертификаттарынан,  минньигэс призтарынан наҕараадаланнылар.

Оҕолорго правовой  көмө күнүгэр кыттыбыт Чурапчы нэһилиэгин тэрилтэлэригэр махтал тылларын аныыбыт. Общественнай бэрээдэги тупсарыыга, оҕолорго правовой билиини-көрүүнү үөрэтиигэ, кэҥэтиигэ инникитин даҕаны бука бары бииргэ түмсэн үлэлиирбит үрдүк көдьүүстээх буолуо.

Н.Н.Аммосова,

Чурапчытааҕы кииннэммит библиотечнай ситим

правовой информация киинин гл.библиотекара.

 Сэтинньи  6 күнүгэр  улуус  библиотекатын  үлэһиттэрин  семинара  буолла. Семинарга  библиотека үлэтин  тэрийии  боломуочуйаларын улуус  таһымыгар  кииннээһин  боппуруостара, библиотека  учуотун, отчуотун  дьыалатыгар  киирэр   уларыйыылары билиһиннэрии уонна  ону  толорууга сүбэлэр  оҥоһулуннулар.

 

 Сэтинньи  ыйга  ааҕааччы киэҥ  араҥатыгар  сүрэхтэммит  кинигэлэр: Улуу Кыайыы 70 сылынан,  Россияҕа литература  сылынан буойун-поэт В.И.Башарин хоһоонноро  түмүллэн «Көмүс  далаһа»  диэн  кинигэни  оҕолоро, сиэннэрэ  хомуйан  таһаардылар.

 Е.Ф. Дьячковская  - Иэйэ  «Иэйэр  кутум илгэтэ»,  хоһооннорун  хомуурунньугун  бастакы  кинигэтэ  күн  сирин көрдө.

Эдэр  автор  Н.Н.Бушуева -  Арчылаана  “Күн  тэҥэ киһикээм, күн-күбэй ийэккээм”  диэн саҥа  кинигэтэ  бэчээттэнэн  таҕыста.

 

Литература  сылынан  улуус библиотекалара араас таһымнаах фестиваллары, конкурстары, көрсүһүүлэри, литературнай оонньуулары,  биэчэрдэри тэрийдилэр. Бу  чэрчитинэн Одьулуун  нэһилиэгэр  литература  дьоро  киэһэтэ ыытылынна. Биэчэргэ  оҕолор сыл  символларынан буолбут  Улуу Пушкин, Н.Гоголь, Анна  Ахматова  уобарастарын санатар  көстүүмнэри кэтэн  тахсан, кинилэр  айымньыларын ааҕыылартан саҕаланна.  Быйыл нуучча лирик-поэта С.Есенин  төрөөбүтэ 120  сыла туоларынан, орто  оскуола  учуутала Т.П.Заболоцкая поэт  оло5ун, айар үлэтин туһунан  сырдатта. Салгыы биэчэр бары кыттыылаахтара, көрөөччүлэр С.Есенин  «Береза»  диэн  хоһоонун нууччалыы уонна төрөөбүт  тылынан доргуччу  ааҕан иһитиннэрдилэр, 5-с кылаас  үөрэнээччилэрэ А.Пушкин «Руслан уонна Людмила» поэматыттан инсценировка  туруоран  көрдөрдүлэр. Биэчэр  иккис түһүмэҕэ биир  дойдулаахпыт,  поэт  Д.Дыдаев  төрөөбүтэ  80 сылыгар ананна. Литературнай биэчэр “Наши  духовные  ценности”  кинигэ быыстапканан, “Күнчээн” уһуйаан иитиллээччилэрин хоһооннорунан,  нэһилиэк айар  куттаах талааннаах хоһоон суруйааччылар, ырыа  айааччылар түһүмэхтэринэн түмүктэннэ.

А.Р.Аржакова,

Одьулууннааҕы модельнай 

библиотека сэбиэдиссэйэ

 

        Улууска аҕам саастаах дьоҥҥо аналлаах декада ыытылла турар.Чурапчы нэһилиэгин “Центральнай” ТОС-ка олорор кырдьаҕастар куруук биһиги үлэбитигэр сүбэлэринэн-амаларынан, ыллыктаах тылларынан, ыытар тэрээһиннэргэ кыттан көх-нэм буолаллар.

        Алтынньы 7 күнүгэр улуустааҕы киин библиотекаҕа “Ис сүрэхтэн” диэн истиҥ –иһирэх киэһэ буолан ааста.Кэлбит ыалдьыттары Чурапчы нэһилиэгин социальнай боппуруостарга солбуйаачччы Гуляев Петр Егорович, ТОС салайааччыта Захарова Наталья Гаврильевна, түөлбэ салайааччылара, кииннэммит библиотечнай ситим директора Платонова Вера Апполоновна эҕэрдэлээтилэр, педагогическай үлэ ветераннара Санникова Аграфена Игнатьевна, Феофанова Матрена Ивановна үтүө алгыс тылын анаатылар.Үлэ ветерана Павлова Екатерина Иннокентьевна “Эбээ сылаас илиитинэн” диэн быыстапката кэлбит дьон сэҥээриилэрин ылла. Екатерина Иннокентьевна күрүчүөгүнэн баайбыт былааттара, салфеткалара, сабыылара кырдьык да сүрдээх сиэдэрэйдэр. Манна бэлиэтээн эттэххэ биһиги түөлбэҕэ уран тарбахтаах уустар, сиэдэрэй талба талааннаах иистэнньэҥнэр, хомоҕой тыллаах хоһоонньуттар олорбуттара, билигин да айаллар- туталлар. Кэлбит ыалдьыттарбыт ырыа ыллаан, хоһоон ааҕан, ыытыллыбыт оонньууларга кыттан,сылаас чэй иһэ-иһэ ирэ- хоро кэпсэтэн үөрэн-көтөн, сэргэхсийэн тарҕастылар.